Pirok O Nomásag

<!-- وپ:پَرَگرَپہ -->

<!-- /وپ:پَرَگرَپہ -->

<!-- وپ:پَرَگرَپہ -->
آ کَماش چَہ ڈِگار ءَ سئے لَچ ماش ءِ رُنَگ ءُ کۆسَگانی سَر چِنَگ ءَ رَند، ڈَگَّرێں کَہیر ءِ چێرا پہ دَم کَنَگ ءَ تَچک اَت۔ گَرماگی نێمرۆچاں ھَروَہدا کہ آئی ءَ چَہ کار ءَ دَم بُرت، ساسارَگ ءَ ھَمے پیرێں بلے ساہِگدارێں کَہیر ءِ چێرا اَتک ءُ نِشت۔
<!-- /وپ:پَرَگرَپہ -->

<!-- وپ:پَرَگرَپہ -->
اِے نی آئی ءِ آدَت اَت۔ چۆ ڈَگَّرێں کَہیر ءِ جِند ءِ رۆتَگاں اِے آدَت ئے رۆتَگ اَنچۆ جُہل شُتَگَت اَنت کہ کَماش ءَ دِگِہ ھِچّ کَہیر ءِ چێر وَشّ نَبُوت۔ اێدِگِ کَماشاں آ بَرے بَرے کَلاگ زُرت کہ اِے کَہیر یَکّ رۆچے تَئی جِند ءَ چێر تَرّێنیت بلے آئی ءِ پَسَّو مُدام ھَمِش اَت کہ کْوَہنێں ھَمراہانی یَلَہ کَنَگ گران اِنت۔
<!-- /وپ:پَرَگرَپہ -->

<!-- وپ:پَرَگرَپہ -->
آئی ءِ دِل پہ واب ءَ رَوَگی اَت کہ بے تَوارێں چاگِرد ءَ پادبرَمشے گۆشان ئِے کَپت۔ چَکّ ئِے جَت ءُ چارِت ئِے۔ آئی ءِ چُکّانی مات ءَ سُبارِگ گۆن اَت ءُ پێداگ اَت۔ ھُردُکێں رِگِتّ ئِے ھَم گۆن اَت۔ آ گۆں نُماسَگ ءِ گِندَگ ءَ گَل بُوت۔ آئی ءِ نِشار مَرچی وَتی مات ءُ پِت ءِ چارَگ ءَ کَور ءَ آدَست ئے بازار ءَ شُتَگَت۔ جِنِکُّو کہ نۆک شیر ءَ پَچ اَت، بُرتَگَت ئِے گۆں بلے رِگِتّ ھَمِد ءَ اَت۔
<!-- /وپ:پَرَگرَپہ -->

<!-- وپ:پَرَگرَپہ -->
“بَچَہ! تَو مات ءَ نَشُت ئے گۆں؟” کَماش ءَ چَہ نُماسَگ ءَ جُست کُت بلے نُماسَگ ءَ پێش زال ءَ پَسَّو دات۔
<!-- /وپ:پَرَگرَپہ -->

<!-- وپ:پَرَگرَپہ -->
“شیرێن ءَ وَ گُشت کہ بُرێں بلے اِشیا گُشت اگں پیربا گۆن اِنت، مَن کایاں گۆں۔”
<!-- /وپ:پَرَگرَپہ -->

<!-- وپ:پَرَگرَپہ -->
کَماش ءَ ٹَہک دیانا نُماسَگ بَڈّ ءَ کُت ءُ پێشانیگ ئِے چُکِّت۔ چَرے گَپّ ءَ کَماش ءِ دِل وَشّ بُوت کہ آئی ءِ نُماسَگ مات ءَ گێش گۆں آئی ءَ لِچِّتَگ۔ ھَمے سَہت ءَ کَہیر ءِ سَر ءَ نِشتَگێں کَپۆتے کُوکُو ءَ لَگِّت۔ گْوَنڈُو ءِ دِلگۆش ھَمانگُر شُت۔
<!-- /وپ:پَرَگرَپہ -->

<!-- وپ:پَرَگرَپہ -->
“پیربا!” آئی ءَ گۆں کَماش ءَ گُشت۔
<!-- /وپ:پَرَگرَپہ -->

<!-- وپ:پَرَگرَپہ -->
“ھاں، مَنی چُکّ!”
<!-- /وپ:پَرَگرَپہ -->

<!-- وپ:پَرَگرَپہ -->
“پیربا! مَن ءَ کَپۆتے بِدئے۔”
<!-- /وپ:پَرَگرَپہ -->

<!-- وپ:پَرَگرَپہ -->
“کَپۆتے؟ چۆن ئِے کن ئے؟” کَماش ءَ کَندِت۔
<!-- /وپ:پَرَگرَپہ -->

<!-- وپ:پَرَگرَپہ -->
“لۆگ ءَ بَران ئِے گۆں۔ بِلّ ئِے ھَمۆدا کُوکُو کَنت۔”
<!-- /وپ:پَرَگرَپہ -->

<!-- وپ:پَرَگرَپہ -->
“چۆ گِرَگ نَبَنت، مَنی چُکّ! بال کَن اَنت۔ مَن رَند ءَ دام ءِ سَر ءَ پہ تَو یَکّے گِراں کاراں گۆں۔ اَنّی مَن دَم بُرتَگ۔ شُدیگ آں، نَگَن وَراں۔ شَرّ اِنت؟” کَماش ءَ گُشت ءُ ساکِمێں نُماسَگ ءَ مَنِّت بلے گۆش ئِے اَنگَت کَپۆت ءِ کُوکُوان اَت اَنت۔
<!-- /وپ:پَرَگرَپہ -->

<!-- وپ:پَرَگرَپہ -->
نُماسَگ ءِ گَپّاں کَماش وَتی یَکّێں بَچّ ءِ تْرانَگ ءَ پِرّێنت کہ دَبَیا کار ءَ اَت۔ آئی ءَ ھَم کَسانی ءَ کَپۆت ءِ کُوکُو دۆست بیت اَنت۔ رِگِتّ رَنگ ءُ دانَگ ءَ پِت ءِ دارێں سَر اَت ءُ گَپّ ءُ آدَت ئِے ھَم ھَماَئێگئی اَت اَنت۔ بَچّ ءَ دو سال ءُ نێم اَت کہ وَلاِتان اَت۔ آ وَہدی کہ آ شُت رِگِتّ نۆکی چَہ شیر ءَ پَچ اَت ءُ جِنِکُّو نِشار ءِ لاپ ءَ اَت۔
<!-- /وپ:پَرَگرَپہ -->

<!-- وپ:پَرَگرَپہ -->
“ھَو، دێر ئِے کُت،” کَماش ءِ دَپ ءَ بے اِرادَہی دَر اَتک۔ پیرزال کہ بارێں چِہ ھَیالان اَت، گُڈِت ءُ وَتی مَرد ءِ نێمَگ ءَ رۆک رۆک ءَ چارَگ ءَ لَگِّت۔
<!-- /وپ:پَرَگرَپہ -->

<!-- وپ:پَرَگرَپہ -->
“کئے ءَ دێر کُت؟ مَن؟”
<!-- /وپ:پَرَگرَپہ -->

<!-- وپ:پَرَگرَپہ -->
“نہ، نہ۔ تَو نہ۔ رِگِتّ جان ءِ پِت ءَ ۔ آئی ءَ ھَم کَپۆتانی کُوکُو دۆست بَنت،” کَماش ءَ گُشت ءُ پیرزال ءِ کْرِچکێں دێم ءَ اَبێتکیے ءَ ماں شانت۔ دُێناں پہ دۆستی وَتی نُماسَگ ءِ نێمَگ ءَ چارِت کہ کَپۆت ءِ کُوکُواں دِلگۆش اَت۔ کَماش ءَ گۆں گَرّ گَرّێں تَوارے ءَ کُوکّار کُت۔
<!-- /وپ:پَرَگرَپہ -->

<!-- وپ:پَرَگرَپہ -->
“کُوکُوکُو، کُوکُوکُو۔”
<!-- /وپ:پَرَگرَپہ -->

<!-- وپ:پَرَگرَپہ -->
ءُ نُماسَگ ءُ پیرزال ھَرد آئی ءِ سَر ءَ کَندَگ ءَ لَگِّت اَنت۔
<!-- /وپ:پَرَگرَپہ -->

<!-- وپ:پَرَگرَپہ -->
رۆزَرد ءَ وَہدے کَماش ءَ لَچے کاہ بَڈّ ءَ اَت ءُ دێم پہ لۆگ ءَ رَوان اَت، کَپۆتی چُنکیے ھَم گۆن اَت ئِے۔ دام ءَ ھِچّ مُرگ نَگِپتَگَت بلے ڈَگَرّێں کَہیر ءِ چێرا ھَمے چُنکی زُکُرِّتَگَت کہ چَہ وَتی کُدُو ءَ کَپتَگَت۔
<!-- /وپ:پَرَگرَپہ -->

<!-- وپ:پَرَگرَپہ -->
“گۆں ھُشکێں دَستاں رَوَگ ءَ شَرتِر اِنت کہ اِشیا بِبَراں گۆں،” کَماش ءَ دِل ءَ گُشت ءُ چُنکی زُرت گۆں۔ آ دَنینگَہ چَہ لۆگ ءَ کَمّے دیر اَت کہ رِگِتّ پہ گَل ءُ اُمێت کَندان ءُ کْریشتاں، تَچان ءُ سِٹُّک ءَ جَناں، آئی ءِ دێم ءَ اَتک۔
<!-- /وپ:پَرَگرَپہ -->

<!-- وپ:پَرَگرَپہ -->
“پیربا! اِے چِپِلُکے۔” رِگِتّ ءَ چُنکی دَست گِرانا پہ گَل ءُ ھَیرانی گُشت۔
<!-- /وپ:پَرَگرَپہ -->

<!-- وپ:پَرَگرَپہ -->
“ھَو، مَنی چُکّ! اِے تَئی وَڈێںے۔” کَماش ءَ بِچکَندِت۔
<!-- /وپ:پَرَگرَپہ -->

<!-- وپ:پَرَگرَپہ -->
“اِے کُوکُو کَنت؟”
<!-- /وپ:پَرَگرَپہ -->

<!-- وپ:پَرَگرَپہ -->
“اِنّاں، دَنینگَہ کَسان اِنت۔”
<!-- /وپ:پَرَگرَپہ -->

<!-- وپ:پَرَگرَپہ -->
“تَو نَگُشت تَئی وَڈێںے؟ مَن بارێں گَپّ زاناں۔ اِے چِتَور کُوکُو نَزانت؟” رِگِتّ ھَیران اَت۔
<!-- /وپ:پَرَگرَپہ -->

<!-- وپ:پَرَگرَپہ -->
“تَرا پَنچ سال اِنت۔ اِشیا بَلکێں پَنچ رۆچ نَبیت۔” کَماش ءَ کَندِت۔
<!-- /وپ:پَرَگرَپہ -->

<!-- وپ:پَرَگرَپہ -->
ھُردُکێں رِگِتّ ءِ سَر پِر نَبُوت کہ وَہدے آئی ءِ اُمر پَنچ سال اِنت ءُ کَپۆت ءِ چُنکی ءِ اُمر پَنچ رۆچ اِنت گُڈا آ چۆن یَکّ اَنت؟ بلے آئی ءَ اِے چیستان ءِ سَر ءَ گێشێں وَہدزَوالی نَکُت ءُ گۆں پیرُک ءَ گُشت:
<!-- /وپ:پَرَگرَپہ -->

<!-- وپ:پَرَگرَپہ -->
“پیربا! اِشیا مَن کُوکُو گُشاں گۆں۔”
<!-- /وپ:پَرَگرَپہ -->

<!-- وپ:پَرَگرَپہ -->
رِگِتّ ءَ چُنکی وَتی دَپ ءِ نَزّیک ءَ آُرت ءُ کَپۆت ءِ وَڈ ءَ کُوکُو ءَ لَگِّت۔
<!-- /وپ:پَرَگرَپہ -->

<!-- وپ:پَرَگرَپہ -->
“تُہ نامِ ھُدا، تُہ ماشَلّا!” کَماش ءَ وَتی نُماسَگ تُکّ جَت۔ آئی ءِ چَمّ نَہ اَت اَنت، کارچ اَت اَنت۔ یَکّ رَندے ڈِگار ءِ نَنگار دَیَگ ءِ وَہد ءَ آئی ءَ نَنگار ءِ تَوسیپ ءَ دِل ءَ بَسّ ھَمے گُشت کہ نَنگارے نَہ اِنت گُش ئے زَہمے گُہارگایدَگ۔ ءُ ھما دَمان ءَ نَنگار ءِ کَمێر پْرُشت۔ آئی ءَ نُماسَگ پَدا تُکّ جَت۔
<!-- /وپ:پَرَگرَپہ -->

<!-- وپ:پَرَگرَپہ -->
مَگرَبتَہارا بارێں چَہ کُجانگُر جَمبَراں سَر کَشِّت ءُ زیتّاں آزمانِش پُچِت۔ آیاں شام کُتَگ ءُ نِشتَگَت اَنت کہ تْرَمپاں اێر دات۔
<!-- /وپ:پَرَگرَپہ -->

<!-- وپ:پَرَگرَپہ -->
“شَرّ بُوت مَن ماش ھَلّێنت اَنت۔ اگں نہ ھَور ءَ آیانی کار بَرابَر کُتَگَت،” کَماش ءَ گۆں زال ءَ گُشت ءُ آئی ءِ کُٹّ ءَ نِشتَگێں نُماسَگ ءَ گُش ئے گَپّے تْرانَگ کُت۔
<!-- /وپ:پَرَگرَپہ -->

<!-- وپ:پَرَگرَپہ -->
“پیربا!”
<!-- /وپ:پَرَگرَپہ -->

<!-- وپ:پَرَگرَپہ -->
“ھاں۔”
<!-- /وپ:پَرَگرَپہ -->

<!-- وپ:پَرَگرَپہ -->
“اَنّی اَمّا ھَور ءِ سَر ءَ اِنت؟”
<!-- /وپ:پَرَگرَپہ -->

<!-- وپ:پَرَگرَپہ -->
“نہ اَڈ ءِ، آ وَتی اَمّا ئے لۆگ ءَ اِنت۔” کَماش ءَ کَندِت۔
<!-- /وپ:پَرَگرَپہ -->

<!-- وپ:پَرَگرَپہ -->
“اَمّاءَ بُگُش ڈَنّ ءَ دَر مَیا۔ ھَور اِنت۔”
<!-- /وپ:پَرَگرَپہ -->

<!-- وپ:پَرَگرَپہ -->
کَماش ءَ چَمّ نَزّ کُت اَنت ءُ اَنچۆ گَپّ جَت گُش ئے نِشار آئی ءِ تَوار ءَ اِشکُنَگ ءَ اِنت۔
<!-- /وپ:پَرَگرَپہ -->

<!-- وپ:پَرَگرَپہ -->
“شیرێں! رِگِتّ گُشیت ڈَنّ ءَ دَر مَیا، ھَور اِنت۔”
<!-- /وپ:پَرَگرَپہ -->

<!-- وپ:پَرَگرَپہ -->
“بُگُش نُنُّک ءَ ھَم دَر آیَگ ءَ مَیل۔”
<!-- /وپ:پَرَگرَپہ -->

<!-- وپ:پَرَگرَپہ -->
“گُشیت نُنُّک ءَ ھَم دَر آیَگ ءَ مَیل۔”
<!-- /وپ:پَرَگرَپہ -->

<!-- وپ:پَرَگرَپہ -->
رِگِتّ ءِ چَمّ لۆگ ءِ دێم ءَ دْرَتکَگێں ڈَبّا شُت اَنت کہ آئی ءِ تَہا چُنکی بَند اَت۔
<!-- /وپ:پَرَگرَپہ -->

<!-- وپ:پَرَگرَپہ -->
“پیربا!”
<!-- /وپ:پَرَگرَپہ -->

<!-- وپ:پَرَگرَپہ -->
“ھاں مَنی چُکّ!”
<!-- /وپ:پَرَگرَپہ -->

<!-- وپ:پَرَگرَپہ -->
“چُنکی ءَ اَمّا ھَست؟”
<!-- /وپ:پَرَگرَپہ -->

<!-- وپ:پَرَگرَپہ -->
“ھَو۔” کَماش ءَ پَدا کَندِت۔
<!-- /وپ:پَرَگرَپہ -->

<!-- وپ:پَرَگرَپہ -->
“اَنّی کُج ءَ اِنت؟”
<!-- /وپ:پَرَگرَپہ -->

<!-- وپ:پَرَگرَپہ -->
“ڈَگَّرێں کَہیر ءِ کُدُو ءَ اِنت۔”
<!-- /وپ:پَرَگرَپہ -->

<!-- وپ:پَرَگرَپہ -->
“آئی ءَ ھَم بُگُش ڈَنّ ءَ دَر مَیا۔”
<!-- /وپ:پَرَگرَپہ -->

<!-- وپ:پَرَگرَپہ -->
کَماش ءَ اِے کُلَہ ھَم سَر کُت۔
<!-- /وپ:پَرَگرَپہ -->

<!-- وپ:پَرَگرَپہ -->
“پیربا! چُنکی ءَ پیربا ھَست؟”
<!-- /وپ:پَرَگرَپہ -->

<!-- وپ:پَرَگرَپہ -->
“ھَو اَڈ ءِ،” کَماش ءَ گُشت ءُ پیرزال ءَ کَندِت۔
<!-- /وپ:پَرَگرَپہ -->

<!-- وپ:پَرَگرَپہ -->
“اَنّی کُج ءَ اِنت؟ ڈَگَّرێں کَہیر ءِ کُدُو ءَ اِنت؟”
<!-- /وپ:پَرَگرَپہ -->

<!-- وپ:پَرَگرَپہ -->
“اِنّاں۔ اِش اِنت۔” پیرزال ءَ کَندان ءَ کَماش ءِ نێمَگ ءَ اِشارَہ کُت ءُ رِگِتّ ھَیراں بُوت۔
<!-- /وپ:پَرَگرَپہ -->

<!-- وپ:پَرَگرَپہ -->
“ھَو، پیربا؟ چُنکی ءِ پیربا تَو ئے؟”
<!-- /وپ:پَرَگرَپہ -->

<!-- وپ:پَرَگرَپہ -->
کَماش ءَ کَندِت۔ “نہ اَڈ ءِ، مَن نَہ آں۔ مَن تَئی پیربا آں۔ چُنکی ءِ پیربا ڈَگَّرێں کَہیر ءِ کُدُو ءَ اِنت۔”
<!-- /وپ:پَرَگرَپہ -->

<!-- وپ:پَرَگرَپہ -->
“پیربا! تَو شَپ ءَ مَنی واست ءَ کِسَّہ کار ءِ۔ چُنکی ءِ پیربا کِسَّہ کاریت؟”
<!-- /وپ:پَرَگرَپہ -->

<!-- وپ:پَرَگرَپہ -->
کَماش ءَ پَدا وَتی کَندَگ داشت نَکُت۔
<!-- /وپ:پَرَگرَپہ -->

<!-- وپ:پَرَگرَپہ -->
“ھَو اَڈ ءِ، چُنکی ءِ پیربا اَنچێں کِسَّہ کاریت کہ مَنِش ھَم نَزاناں۔”
<!-- /وپ:پَرَگرَپہ -->

<!-- وپ:پَرَگرَپہ -->
“ھَو؟” رِگِتّ ھَیراں بُوت۔
<!-- /وپ:پَرَگرَپہ -->

<!-- وپ:پَرَگرَپہ -->
“اَچہ چے۔” کَماش ءَ گُش ئے رِگِتّ ءِ ھَیراں کَنَگ وَشّ بُوت۔ رِگِتّ ءَ گۆں ناباوَری وَتی پیرُک ءَ را چارِت۔ آئی ءَ ھَروَہدا اێدِگِ گْوَنڈُوانی کِرّا گُرِّت کہ مَنی پیربا چَہ شُمَیگاں گێشتِر کِسَّہ زانت۔ بلے نی اِے گَپّ ءَ آ نَگێگ کُت کہ چُنکی ءِ پیربا چَہ آَئێگئی ءَ ھَم گێشتِر کِسَّہ زانت۔ آئی ءَ کَمّے ھَیال کُت ءُ پَدا چُنکی ءِ نێمَگ ءَ چارانا جُست کُت: “پیربا! چُنکی باندا کُوکُو کَنت، گِند ئے؟”
<!-- /وپ:پَرَگرَپہ -->

<!-- وپ:پَرَگرَپہ -->
“ھَوووو،” کَماش ءَ دْراجێں ھَوے جَت۔
<!-- /وپ:پَرَگرَپہ -->

<!-- وپ:پَرَگرَپہ -->
ڈَنّ ءَ ھَور تْرُند بَیان اَت۔ رِگِتّ ءَ داں سَہتُکے ھَور ءِ تَوار گۆش داشت ءُ پَدا گُش ئے چُرتے ءَ کَپت۔
<!-- /وپ:پَرَگرَپہ -->

<!-- وپ:پَرَگرَپہ -->
“پیربا،” آئی ءَ آناگہا گُشت، “نی مَن زاناں، چُنکی چی ءَ کُوکُو نَکَنت۔”
<!-- /وپ:پَرَگرَپہ -->

<!-- وپ:پَرَگرَپہ -->
“ھَو؟” کَماش ءَ وَت ءَ زۆر ھَیراں کُت۔
<!-- /وپ:پَرَگرَپہ -->

<!-- وپ:پَرَگرَپہ -->
“ھَو، اِشیا وَتی پیربا ءِ کِسَّہانی واست ءَ زَہیر کَنت۔ پیربا! چُنکی ءَ کِسَّہے بِجَن ءُ بِدئے۔”
<!-- /وپ:پَرَگرَپہ -->

<!-- وپ:پَرَگرَپہ -->
کَماش ءَ پیرزال ءِ نێمَگ ءَ چارِت ءُ پَدا ھَردُکاں کَندِت۔ آزمان ءَ جَمبَر ءَ ھَم ٹَہک دات۔
<!-- /وپ:پَرَگرَپہ -->

<!-- وپ:پَرَگرَپہ -->

<!-- /وپ:پَرَگرَپہ -->

<!-- وپ:پَرَگرَپہ -->
<!-- /وپ:پَرَگرَپہ -->

<!-- وپ:پَرَگرَپہ -->

<!-- /وپ:پَرَگرَپہ -->