Shekár

<!-- وپ:پَرَگرَپہ -->
اِپِسّی ئے دُمی سال ءِ کێمیا ءِ کِلاس اَت۔ سَجَّہێں بَچَکّ بے تْرِکّ ءُ تَواریا لِکچَر ءِ گۆش دارَگ ءَ دِلگۆش اَت اَنت۔
<!-- /وپ:پَرَگرَپہ -->

<!-- وپ:پَرَگرَپہ -->
ھَروَہدا کُوکّار ءُ جَگّا کَنۆکێں شَیتانێں بَچَکّانی چُشێں بے تَواری ءُ گۆں لِکچَر ءَ دِلگۆشی ئے یَکّ سَوَبے اِش اَت کہ لِکچَرار کِتاب ءِ اَنچێں دَرے وانێنَگ ءَ اَت کہ چَکّاس ءَ آیَگ ءِ اُمێد ئِے ھَستَت بلے مَستِرێں سَوَب لِکچَرار ئے تْرُندی اَت۔ وانێنَگ ءِ وَہد ءَ آئی ءَ گَپّ یا جَگّا سَگِّت نَکُت۔ گَپّ ءَ بِلّ آئی ءِ کِلاس ءَ چِشَگ، کُلَّگ ءُ گِہاسَگ ھَم بَند اَت۔ اگں کَسے ءَ بے اِنانی پہ گِہاسَگ ءَ دَپ پَچ کُت، بِزاں کہ واجَہ ءِ دَست ءِ چاک آئی ءِ دَپ ءَ پُتِرت۔ چاک ءِ جَنَگ ءَ آئی ءِ نِشانَگ یَکّ ءُ ٹِکّ اَت۔ اگں کَسے ءَ سئے بَراں گێش چِشِت یا کُلِّت گُڈا بِزاں چَہ کِلاس ءَ دَر ئِے کُت ءُ ھِچّ اُزر ئِے گۆش نَداشت۔ ھَرکَس ءَ کُلَّگ ءُ پَشّانک ءَ گِپت گُڈا لِکچَرار ئے دَست ءَ پَشَل بَیَگ ءِ ساہار ءَ اِے کِلاس ءَ نَیَتک۔
<!-- /وپ:پَرَگرَپہ -->

<!-- وپ:پَرَگرَپہ -->
چونایا لِکچَرار سَکّ تْرُند اَت بلے وانێنگا کُنٹ اَت۔ آئی ءَ ھَشت ماہ پێسَر چَہ بَلۆچِستاں دانِشگاہ شالکۆٹ ءَ وَتی وانَگ سَرجَم کُتَگَت ءُ مَزَنێں تَچ ءُ تاکے ءَ رَند ڈِگری کالِج تُربَت ءَ لَگِّتَگَت۔ وانێنَگ ءَ نِزۆر اَت ءُ وَتی ھَمے نِزۆری ءِ چێر دَیَگ ءِ وَستا وَت ءَ تْرُند ئِے کُتَگَت۔
<!-- /وپ:پَرَگرَپہ -->

<!-- وپ:پَرَگرَپہ -->
“سَیَد! تَو گَپّے ءَ سَہی ئے؟” دِلپُلّ ءَ سَیَد ءِ گۆش ءَ ھَلوَت کُت۔
<!-- /وپ:پَرَگرَپہ -->

<!-- وپ:پَرَگرَپہ -->
“اِنّاں، چِہ گَپّے؟” سَیَد کَمّے ھَیراں بُوت۔
<!-- /وپ:پَرَگرَپہ -->

<!-- وپ:پَرَگرَپہ -->
“گَپّ اِش اِنت کہ…”
<!-- /وپ:پَرَگرَپہ -->

<!-- وپ:پَرَگرَپہ -->
دِلپُلّ پہ گَپّ ءِ گُشَگ ءُ سَیَد پہ گۆش دارَگ ءَ گێگ بُوت کہ لِکچَر ءَ را آ دیت اَنت۔
<!-- /وپ:پَرَگرَپہ -->

<!-- وپ:پَرَگرَپہ -->
“اَڈ ءِ اُو! گَپّ مَکَنِت۔”
<!-- /وپ:پَرَگرَپہ -->

<!-- وپ:پَرَگرَپہ -->
دوێں بے تَوار بیت اَنت ءُ لِکچَر ءَ را پَدا وانێنَگ بُنگێج کُت۔ سَیَد ءِ دِل ءَ دَم پہ سَہت ھَمے گَپّ پاد اَتک کہ بارێں دِلپُلّ ءَ چِہ گَپّے گۆں بلے لِکچَرار ئے تُرسا ھِچّ ئِے نَگُشت۔ پێسَر ءَ اَنگَت آ چَہ لِکچَر ءَ لَبزے لَبزے پۆہ بَیَگ ءَ اَت بلے نی آئی ءِ دِلگۆش چَٹ دیر اَتک۔ دِل ءِ تَہا داں سَہتُکے کَشّانچیلّا رَند آئی ءَ پَدا دِلپُلّ ءِ نێمَگ ءَ چارِت ءُ ھَلوَت کُت۔ “دِلپُلّ! بُگُش بارێں چِہ گَپّے؟”
<!-- /وپ:پَرَگرَپہ -->

<!-- وپ:پَرَگرَپہ -->
“اَنّی بِلّ یار! رَند ءَ گُشاں گۆں۔” دِلپُلّ ءَ ھَلوَتی گُشت۔
<!-- /وپ:پَرَگرَپہ -->

<!-- وپ:پَرَگرَپہ -->
“نہ یار! اَنّی بُگُش گۆں۔” سَیَد ءَ گِرّ بَست۔
<!-- /وپ:پَرَگرَپہ -->

<!-- وپ:پَرَگرَپہ -->
“اَڈ ءِ، واجَہ زَہر گیپت،” دِلپُلّ ءَ گُشت ءُ واجہ ئے نێمَگ ءَ چارِت۔ واجَہ ءِ چَمّ پێسَر ءَ ھَمینگُر سَکّ اَت اَنت۔
<!-- /وپ:پَرَگرَپہ -->

<!-- وپ:پَرَگرَپہ -->
“شُما پَدا گَپّ ءَ اِت؟”
<!-- /وپ:پَرَگرَپہ -->

<!-- وپ:پَرَگرَپہ -->
دوێں تُکّ ءُ نُکّ بُوت ءُ نِشت اَنت۔ سَیَد سَرزاہَرا لِکچَر ءَ گۆش دارَگ ءَ اَت بلے دِل ءِ تَہا پہ دِلپُلّ ءِ نێمتَوامێں گَپّ ءِ اِشکُنَگ ءَ بے تاہیر اَت ءُ وَہدے لِکچَرار بَوڈ ئے سَر ءَ چیزّے نِبِشتَہ کَنَگ ءَ لَگِّت، سَیَد ءَ گُشادیا چَہ دِلپُلّ ءَ جُست کُت: “ھاں بارێں، بُگُش گَپّ چے اِنت؟”
<!-- /وپ:پَرَگرَپہ -->

<!-- وپ:پَرَگرَپہ -->
“گَپّ اِش اِنت کہ ٹاپُو شُتَگ کَراچی ءَ ۔” دِلپُلّ ءَ چَہ زْیادَہێں جُستاں رَکَّگ ءِ واست ءَ گَپّ گُشت گۆں۔
<!-- /وپ:پَرَگرَپہ -->

<!-- وپ:پَرَگرَپہ -->
“ھَووو؟” سَیَد ءِ ھَیرانێن ءُ چۆ بُرزێں تَوار دْراہێں کِلاس ءَ شِنگ بُوت۔ دْرُستێں بَچَکّاں چَکّ جَت ءُ چارِت ءُ لِکچَرار ئے کُورّاتَگێں چاک ءِ ٹُکُّر تَچک ءَ سَیَد ءِ ھَیرانێں دَپ ءَ پُتِرت۔ بَچَکّاں دَپ داشت ءُ کَندَگ ءَ لَگِّت اَنت۔
<!-- /وپ:پَرَگرَپہ -->

<!-- وپ:پَرَگرَپہ -->
“شُمئے دُێنانی دَپ نَۆشتیت۔ شاباش، دَر آِت، دَر آِت۔”
<!-- /وپ:پَرَگرَپہ -->

<!-- وپ:پَرَگرَپہ -->
“واجَہ ما…” دِلپُلّ ءَ دَپ پَچ کُت بلے واجَہ ءَ گَپّ گۆش نَداشت۔
<!-- /وپ:پَرَگرَپہ -->

<!-- وپ:پَرَگرَپہ -->
“نہ، نہ، چِکِّت ئِے۔ نہ وَت وانِت نہ دِگِراں کِلِّت۔ شاباش، کَشِّت وَتی بُوچّ ءَ !”
<!-- /وپ:پَرَگرَپہ -->

<!-- وپ:پَرَگرَپہ -->
دِلپُلّ ءُ سَیَد پَشَل پَشَلا چَہ کِلاس ءَ دَر اَتک اَنت۔
<!-- /وپ:پَرَگرَپہ -->

<!-- وپ:پَرَگرَپہ -->
“تَو یار! لِکچَر ءِ سَہت ءَ پَرچا ٹاپُو ءِ گَپّ شُرُو کُت؟” سَیَد دِلپُلّ ءِ سَر ءَ نُرُنڈَگ ءَ اَت۔
<!-- /وپ:پَرَگرَپہ -->

<!-- وپ:پَرَگرَپہ -->
“سۆچ لِکچَر ءَ ، داں “نَکل جاں” زِندَگ اِنت چی ءَ چُرت جن ئے؟ بُرێں کَنٹین ءَ تَرا ٹاپُو ءِ ھالاں دیاں۔” دِلپُلّ ءَ سَیَد ءِ دَست ءَ گِپت ءُ دوێں دێم پہ کَنٹین ءَ شُت اَنت۔
<!-- /وپ:پَرَگرَپہ -->

<!-- وپ:پَرَگرَپہ -->
کالِج ءِ کَنٹین ءِ دو کۆٹی اَت اَنت۔ کَستِرێں کۆٹی ءَ چَہگراد نَئی بَکش ءَ چاہ گْراست ءُ اێدِگِ مَستِرێں کۆٹی ءَ بَچَکّاں نِشت ءُ چاہ وارت۔ بَچَکّانی بازی ءِ سَوَب ءَ آئی ءَ کَسانێں کۆٹی ءَ ھَم چیزّے کُرشی جَتَگَت۔ آس رۆک بَیَگ ءِ سَوَب ءَ کَستِرێں کۆٹی ءَ گَرماگ ءَ بے کِ نَئی بَکش ءَ دِگِہ کَسّ نِشت نَبُوت بلے زِمِستان ءَ باپ ءُ وَشّ اَت۔
<!-- /وپ:پَرَگرَپہ -->

<!-- وپ:پَرَگرَپہ -->
مَرچی گۆریچ ءَ مۆسُم سَکّ سارت کُتَگَت۔ آ نَئی بَکش ءِ باپێں کۆٹی ءَ پُتِرت اَنت بلے اود ءَ جاگَہ نێستَت۔ کُرشی دْراہ پُرّ اَت اَنت۔ آ مَستِرێں کۆٹی ءَ شُت ءُ نِشت اَنت کہ ھۆرک اَت بلے سارت اَت۔
<!-- /وپ:پَرَگرَپہ -->

<!-- وپ:پَرَگرَپہ -->
“نَئی بَکش! دو چاہ،” دِلپُلّ ءَ چَمِدا کُوکّار کُت چی ءَ کہ دوێں کۆٹی ڈُکِّتَگَت اَنت۔
<!-- /وپ:پَرَگرَپہ -->

<!-- وپ:پَرَگرَپہ -->
“شَرّ اِنت، شَرّ اِنت،” نَئی بَکش ءَ چَمۆدا کُوکّار کُت۔ “شُما پیس وَرِت گۆں، جاں؟” آئی ءَ کێک ءَ را “پیس” ءُ بَچَکّانا “جاں” گُشَگ ھێل کُتَگَت۔
<!-- /وپ:پَرَگرَپہ -->

<!-- وپ:پَرَگرَپہ -->
“ھَو، ھَو،” سَیَد ءَ پَسَّو دات ءُ دێم گۆں دِلپُلّ ءَ تَرّێنت۔ “نی بُگُش بارێں۔ ٹاپُو چی ءَ کَراچی ءَ شُتَگ؟”
<!-- /وپ:پَرَگرَپہ -->

<!-- وپ:پَرَگرَپہ -->
“پِت ءَ بُرتَگ، وانێنَگ ءَ۔”
<!-- /وپ:پَرَگرَپہ -->

<!-- وپ:پَرَگرَپہ -->
“وانێنَگ ءَ؟ آ وَ ھَمِد ءَ وانَگ ءَ اَت۔”
<!-- /وپ:پَرَگرَپہ -->

<!-- وپ:پَرَگرَپہ -->
“پِت ئِے گُشیت اِد ءَ نَوانیت۔” دِلپُلّ ءَ گُشت ءُ سَیَد ءَ کَندِت۔
<!-- /وپ:پَرَگرَپہ -->

<!-- وپ:پَرَگرَپہ -->
“بِشتێن ئِے۔ ما وَت وانێنتَگ ءُ مُلا کُتَگَت، ھا ھا ھا۔ کَدی بُرتَگ ئِے؟
<!-- /وپ:پَرَگرَپہ -->

<!-- وپ:پَرَگرَپہ -->
“پَیری۔”
<!-- /وپ:پَرَگرَپہ -->

<!-- وپ:پَرَگرَپہ -->
کَنٹین ءِ بَچَکّ ءَ چاہ ءُ کێک آُرت اَنت۔ دِلپُلّ ءَ چاہ ءَ گُٹّے گِپت ءُ گُش ئے ھَیالے ءَ کَپت ءُ سَیَد ءِ چَمّ دَریگ ءِ بَندێں کانچاں ڈَنّ کالِج ءِ دْرَچکاں سَکّ اَت اَنت کہ گۆریچ آیانی گْوَرشاہ ءُ سَرشاہاں چَنڈێنگا اَت۔ گۆریچ ءِ دَوا باپی اِنت ءُ آیانی اِے باپ دیۆک چَہ دَست ءَ شُتَگَت۔
<!-- /وپ:پَرَگرَپہ -->

<!-- وپ:پَرَگرَپہ -->
“اَڈ ءِ، شُما اِد ءَ نِشتَگِت؟ مَن شُمارا دْرُستێں کالِج ءَ پَٹِّتَگ۔”
<!-- /وپ:پَرَگرَپہ -->

<!-- وپ:پَرَگرَپہ -->
دوێں چَہ وَتی ھَیالاں دَر اَتک اَنت۔ اُمێد کَندان ءَ پێداگ اَت۔ اُمێد، سَیَد ءُ دِلپُلّ یَکّێں پاڈَو ءِ نِندۆک اَت اَنت ءُ نَزّیکێں سَنگَت اَت اَنت۔ آ مُدام ھَمراہ اَت اَنت۔ اِسکۆل ءِ زَمانَگ ءَ سَیێں ھَمسَبَکّ اَت اَنت بلے اُمێد دَہ ءَ بے سۆب بُوت ءُ نی چَہ دُێناں سالے پَشت اَت۔
<!-- /وپ:پَرَگرَپہ -->

<!-- وپ:پَرَگرَپہ -->
“مَزَنێں چُرتے ءَ کَپتَگِت شُما، گُش ئے لانچ بُڈِّتَگ اَنت شُمئے۔” آئی ءَ کُرشیے کَشِّت ءُ نِشت۔
<!-- /وپ:پَرَگرَپہ -->

<!-- وپ:پَرَگرَپہ -->
“ھَو، اَنچێں گَپّے ءُ تَئی لانچ ھَم سَر نَیَتکَگ،” دِلپُلّ ءَ گُشت ءُ پَدا دْرُستێں گَپّ ئِے جَت ءُ دات اَنت۔ اُمێد ھَم چَہ ٹاپُو ءِ رَوگ ئے ھال ءَ کَمّے پَرێشاں بُوت۔
<!-- /وپ:پَرَگرَپہ -->

<!-- وپ:پَرَگرَپہ -->
“نی نۆکێںے دَر گێجَگ لۆٹیت،” سَیَد ءَ جَوَڈِت۔
<!-- /وپ:پَرَگرَپہ -->

<!-- وپ:پَرَگرَپہ -->
“گْرانێں کارے،” دِلپُلّ ءَ دَرّاێنت۔
<!-- /وپ:پَرَگرَپہ -->

<!-- وپ:پَرَگرَپہ -->
“پَدا ھَم… تَچ ءُ تاک بِکَن ئے رَسیت۔ اِے تُربَت اِنت۔” اُمێد ناُمێد نَہ اَت۔ پَدا دُێنانی نێمَگ ءَ چارانا جُست ئِے کُت، “شُما بارێں کَسّ چَمّانی چێرا نَکُتَگ؟”
<!-- /وپ:پَرَگرَپہ -->

<!-- وپ:پَرَگرَپہ -->
دِلپُلّ ءَ یَکّ بَرے سَر پہ اِنّاں سُرێنت بلے پَدا دَمان ءَ گُشت ئِے: “اَڈ ءِ، یَکّے ھَست۔ سَکّێں ڈَولدارێںے۔ اَوَلی سال ءَ اِنت۔”
<!-- /وپ:پَرَگرَپہ -->

<!-- وپ:پَرَگرَپہ -->
“اِے مَن ھَم دیتَگ بلے نَزاناں کئے اِنت ءُ چۆنێںے۔” سَیَد ءَ ھَم آ بَچَکّ یاد اَتک۔ “اُمێد، تَو ئِے نَزان ئے؟ مَنی ھَیال ءَ تَئی کِلاس ءَ اِنت۔”
<!-- /وپ:پَرَگرَپہ -->

<!-- وپ:پَرَگرَپہ -->
“زانان ئِے، شَرّ ئِے زاناں! نام ئِے پُلّان اِنت، ھاسٹَل ءَ اِنت ءُ…” اُمێد ءَ گَپّ دَپ ءَ اَت کہ بَچَکّے ءَ سَرُکّ کُت ءُ آئی ءَ گَپّ بَند کُت۔ دِلپُلّ ءُ سَیَد ءِ مُورک ھَم مُجِت اَنت۔ چَرائی ئے آیَگ ءَ آیانی مَجلِس ھَراب بیتَگَت۔ آۆکێں بَچَکّ ءَ کہ نام ئِے شێر مَہمَد اَت، اِشانا “چِہ ھالے” جَت ءُ دَروازَگ ءِ نێمَگ ءَ چارِت۔
<!-- /وپ:پَرَگرَپہ -->

<!-- وپ:پَرَگرَپہ -->
“بْیا اَڈ ءِ! جاگَہ ھَست۔”
<!-- /وپ:پَرَگرَپہ -->

<!-- وپ:پَرَگرَپہ -->
یَکّ شَرَّنگێں بَچَکّے کہ دو سئے کِتاب ءُ کاپی ئِے دَست ءَ اَت، پُتِرت۔ سَیێں پہ ھُبّ ءُ واہَگے آئی ءِ دێم ءَ پاد اَتک اَنت۔ شِکار پادِ وَت اَتکَگَت!
<!-- /وپ:پَرَگرَپہ -->

<!-- وپ:پَرَگرَپہ -->
جۆڈی ءَ رَند اُمێد ءَ کَنٹین ءِ بَچَکّ تَوار کُت۔ آ اَتک۔ اُمێد ءَ پُلّان ءِ نێمَگ ءَ چارانا چاہ ءُ کێک ءِ آڈَر دات۔
<!-- /وپ:پَرَگرَپہ -->

<!-- وپ:پَرَگرَپہ -->
“نہ یار! چاہ بَسّ اِنت۔ کێک مَیار۔” پُلّان ءِ ھَمرَہ شێر مَہمَد ءَ دَمان ءَ گُشت ءُ پَدا چَہ پُلّان ءَ جُست ئِے کُت: “تَو کێک وَر ئے گۆں؟”
<!-- /وپ:پَرَگرَپہ -->

<!-- وپ:پَرَگرَپہ -->
“نہ، دِل نَیَیت۔ چاہ بَسّ اِنت،” پُلّان ءَ گُشت ءُ سَیێں گُش ئے دَماںے ءَ پُلّان ءِ وَشّێں تَوار ءِ سِہرا گار بیت اَنت۔ آیاں بازێں شَرَّنگێں بَچَکّے دیتَگَت بلے پُلّاں چَہ دْرُستاں دێماتِر اَت۔ اَنچۆ رَنگ ءُ دانَگ، اَنچۆ گُٹّ۔
<!-- /وپ:پَرَگرَپہ -->

<!-- وپ:پَرَگرَپہ -->
اِے دیواں دَماںے ءَ مَنت۔ گَپّ ءُ رَپّ بُوت۔ کَندَگ ءُ مَسکَرا بُوت۔ وَہدے گَنٹی ءَ تَوار کُت، پُلّان ءُ شێر مَہمَد پاد اَتک اَنت۔ آ وانۆکێں بَچَکّ اَت اَنت ءُ ھَر کِلاسِش گۆں پابَندی گِپت۔
<!-- /وپ:پَرَگرَپہ -->

<!-- وپ:پَرَگرَپہ -->
گۆں پُلّان ءَ اِے گْوَنڈێں نْیاد ءَ سَیێناں تُکشِت کہ وَت ءَ اَدَبدار، مَردُمدۆست ءُ شَرکِرد پێش بِدار اَنت۔ پُلّان ءَ اگں گَپّے جَت، آیاں پہ ھُبّ ءُ واہَگے گۆش داشت ءُ آئی ءِ مَسکَرایانی سَر ءَ اَنچۆ کَندَگ ءِ بَدَل ءَ لاپلێٹی وارت۔ آ شِکار ءِ رِپک ءُ ھُنِراں زَبر اَت اَنت۔ ءُ وَہدے دیواں ھَلاس بُوت، پُلّاں ھَکّ ءُ دِل آیانی سَنگَت جۆڈ بیتَگَت۔
<!-- /وپ:پَرَگرَپہ -->

<!-- وپ:پَرَگرَپہ -->
دو سئے ھَپتَگ گْوَست ءُ اِے دَرگَت ءَ پُلّاں گۆں آیاں سَکّ نَزّیک بُوت۔ چَہ وَتی ھَمباں شێر مَہمَد ءَ ھَم گێش۔
<!-- /وپ:پَرَگرَپہ -->

<!-- وپ:پَرَگرَپہ -->
“پُلّاں! گَپّے بُگُشاں دِل ءَ نیار ئے؟” یَکّ رۆچے شێر مَہمَد ءَ دَرّاێنت۔
<!-- /وپ:پَرَگرَپہ -->

<!-- وپ:پَرَگرَپہ -->
“نہ، نَہ بُگُش۔” پُلّاں کہ وانَگ ءَ اَت، گۆں آئی ءَ دِلگۆش بُوت۔
<!-- /وپ:پَرَگرَپہ -->

<!-- وپ:پَرَگرَپہ -->
“تَو اِے بَچَکّانی اِینچُک ھَمراہ مَبی۔”
<!-- /وپ:پَرَگرَپہ -->

<!-- وپ:پَرَگرَپہ -->
“کَئی؟ اُمێدزَئی ئے؟”
<!-- /وپ:پَرَگرَپہ -->

<!-- وپ:پَرَگرَپہ -->
“ھَو، مَن اِشکُتَگ کہ اِے شَرّێں بَچَکّ نَہ اَنت۔”
<!-- /وپ:پَرَگرَپہ -->

<!-- وپ:پَرَگرَپہ -->
“بلے گۆں مَن سَکّ شَرّ اَنت۔ تَو وَت دیتَگ کہ چۆنێں مَردُمدۆست اَنت۔ وانَگ ءَ بے چارَگ نِزۆر اَنت وَ دِگِہ گَپّے بلے دِگِہ ھَر وَڈ ءَ شَرّ اَنت۔ باوَر کَن مَن ھَروَہدا اِشانی ھَمراہ باں، مَن ءَ کَلدارے ھَم ھَرچ کَنَگ ءَ نَیل اَنت ءُ پہ مَن چۆ بْرات ءَ اَنت۔” پُلّان ءَ آیانی بارَوا شێر مَہمَد ءِ گَپّ دۆست نَبیتَگَت۔
<!-- /وپ:پَرَگرَپہ -->

<!-- وپ:پَرَگرَپہ -->
“چونایا وَ مَن ھَم سَرزاہِرا آیانی تَہا ھَرابی نَگِنداں بلے…”
<!-- /وپ:پَرَگرَپہ -->

<!-- وپ:پَرَگرَپہ -->
“اگں ھَرابیے مانِش زاہِر بیت۔” پُلّان ءَ آئی ءِ گَپّ ءِ تَہا دَور کُت۔
<!-- /وپ:پَرَگرَپہ -->

<!-- وپ:پَرَگرَپہ -->
“چۆ شَرّ اِنت بلے مَن اِشکُتَگ کہ اِے شَرّێں بَچَکّ نَہ اَنت۔ نِشَہ مِشَہ کَنَنَت۔ بَرے بَرے کہ کَنگَلا بَنت، دُزّی دازی ءَ ھَم چَکّ ءُ پَد نَبَنت۔ پَمِشکا مَن چارِت تَرا ھال بِدیاں کہ تَو مَنی سَنگَتے ئے ءُ چُشێں گَپّاں چَہ تَو چێر دَیَگ بَدواہیے بیت۔”
<!-- /وپ:پَرَگرَپہ -->

<!-- وپ:پَرَگرَپہ -->
“اِے بارَوا مَن ھَم اِشکُتَگ۔ یَکّ رۆچے مَن چَہ آیاں جُست ھَم کُت۔ آیاں گُشت ما بیِس (بی ایس او) کَہُور ءِ مَردُم این ءُ اِے دْرۆگ بیِس یاسین ءِ بَچَکّاں شِنگ کُتَگ اَنت۔”
<!-- /وپ:پَرَگرَپہ -->

<!-- وپ:پَرَگرَپہ -->
چَہ پُلّان ءِ اِے گَپّ ءَ شێر مَہمَد کَمّے بے وار بُوت، چی ءَ کہ آ بیِس یاسین ءِ باسکے اَت۔
<!-- /وپ:پَرَگرَپہ -->

<!-- وپ:پَرَگرَپہ -->
پُلّان ءَ آئی ءِ بے واری مارِت ءُ گۆں نَرمی گُشت: “شێر مَہمَد! مَن تَئی سَنگَتی ءُ دۆزواہی ءِ کَدر ءَ کَناں بلے مَنی ھَیال ءَ آ ھَم تَئی پَیم ءَ مَنی سَنگَت ءُ دۆزواہ اَنت،” پُلّان ءَ گُشت ءُ گَپّ چَمِدا کُٹِّت۔
<!-- /وپ:پَرَگرَپہ -->

<!-- وپ:پَرَگرَپہ -->
یَکّ سُہبے کہ پَدا گۆریچ ءَ سَر کُتَگَت، سَیَد ءُ دِلپُلّ ءُ اُمێد کَنٹین ءِ مَستِرێں کۆٹی ءِ کُنجے ءَ زُکُّرتَگ ءُ چاہ وَرَگ ءَ اَت اَنت۔
<!-- /وپ:پَرَگرَپہ -->

<!-- وپ:پَرَگرَپہ -->
“یار! اِشیا مارا زَرّ ءَ چَٹ کُت،” دِلپُلّ گُشَگ ءَ اَت۔
<!-- /وپ:پَرَگرَپہ -->

<!-- وپ:پَرَگرَپہ -->
“پُلّاں اِے ھَرچاں کَرزیت،” سَیَد ءَ بِچکَندِت۔
<!-- /وپ:پَرَگرَپہ -->

<!-- وپ:پَرَگرَپہ -->
“پہ مُرگ ءِ مُژدَوار کَنَگ ءَ مۆچکێں چَنڈَگ لۆٹیت،” اُمێد ءَ ھُژّارێں شِکاری ءِ وَڈ ءَ دَرّاێنت۔
<!-- /وپ:پَرَگرَپہ -->

<!-- وپ:پَرَگرَپہ -->
“چۆ ھَو بلے مَن گُشَگ ءَ آں کہ مۆچکێن ءِ چَنڈَگ کَدی بَند بیت ءُ …”
<!-- /وپ:پَرَگرَپہ -->

<!-- وپ:پَرَگرَپہ -->
“ھَو یار!” سَیَد ءَ دِلپُلّ ءِ گَپّ گِپت گۆں۔ “نی ما لِبز ءِ گُورچێنَگ ءَ دَم بُرتَگ۔”
<!-- /وپ:پَرَگرَپہ -->

<!-- وپ:پَرَگرَپہ -->
“شَرّ اِنت، گُڈا مَرچی وَڈے کَنێں بارێں،” اُمێد ءَ گُشت۔
<!-- /وپ:پَرَگرَپہ -->

<!-- وپ:پَرَگرَپہ -->
ھَمے وَہد ءَ سَیمی پیرَڈ ئے گَنٹی ءَ تَوار کُت۔
<!-- /وپ:پَرَگرَپہ -->

<!-- وپ:پَرَگرَپہ -->
“مَرچی مئے اِے پیرَڈ ھالیگ اِنت۔ مَن رَواں پُلّان ءَ کاراں۔ شُما چے گُشِت؟” دُێناں مَنِّت۔ اُمێد گُشادیا شُت ءُ دێر نَگوَست گۆں پُلّان ءَ اَتک۔ آیاں پَرایا چاہ ءُ کێک لۆٹاێنت۔ کَمّے دِگِہ گَپّ ءُ رَپّ ءَ رَند اُمێد ءَ دَرّاێنت، “پُلّاں، یار! ما پہ تَو داوَتے ٹَہێنتَگ۔”
<!-- /وپ:پَرَگرَپہ -->

<!-- وپ:پَرَگرَپہ -->
“داوَت؟” پُلّاں ھَیراں بُوت۔ “پَرچا؟”
<!-- /وپ:پَرَگرَپہ -->

<!-- وپ:پَرَگرَپہ -->
“نی گۆش دارِت، اِے گُشیت پَرچا، تَو یار مئے شَرّێں سَنگَتے ئے۔ ما تَرا یَکّ رۆچے نانے ھَم وارێنت نَکَنێں؟”
<!-- /وپ:پَرَگرَپہ -->

<!-- وپ:پَرَگرَپہ -->
اُمێد ءَ اَنچۆ گُشت کہ پُلّاں رْیابَند بُوت۔
<!-- /وپ:پَرَگرَپہ -->

<!-- وپ:پَرَگرَپہ -->
داوَت پَشَّمبِہ ءِ شَپ ءَ ٹَہێنَگ بُوت۔ آدێنَگ ءِ چُٹّی دێم ءَ اَت۔ بے گاہ ءَ آیاں پِلِمے چارَگ ءِ پْرۆگرام کُتَگَت۔ پَشَّمبِہ ءِ بے گاہ ءَ اُمێد ءَ پُلّاں چَہ ھاسٹَل ءَ پَرپَٹ ءَ دُپُشتَگ کُت ءُ وَتی مِہمانجاہ ءَ آُرت۔ سَیَد ءُ دِلپُلّ پێسَر ءَ وَداریگ اَت اَنت۔ آپ ءُ تام ءَ رَند ویسیار ءُ ٹیوی گۆں دَرزِنے ریلّا آرَگ بیت اَنت۔
<!-- /وپ:پَرَگرَپہ -->

<!-- وپ:پَرَگرَپہ -->
“تَو چۆنێں پِلِم چار ئے پُلّاں؟” اُمێد ءَ جُست کُت۔ “مَنی کِرّا ھَر وَڈێں ھَست۔ مَتلَب کْوَہنێں، نۆکێں، آرٹ، کَمَرشَل…”
<!-- /وپ:پَرَگرَپہ -->

<!-- وپ:پَرَگرَپہ -->
“مَن ءَ آرٹ دۆستِر بیت۔”
<!-- /وپ:پَرَگرَپہ -->

<!-- وپ:پَرَگرَپہ -->
اُمێد ءَ دِگِہ لَہتے ریلّ پُلّان ءِ دێم ءَ مُچّ کُت۔ پُلّان ءَ یَکّے گِچێں کُت ءُ ھَمے پِر کَنَگ بُوت۔ باپێں بان ءَ نِندَگ ءُ پِلِم چارَگ ءُ گَپّ ءُ رَپ ئے تَہا سَما نَکَپت کہ کَدی شَپ اَتک۔ آیاں ھما وَہدی سَما بُوت وَہدے اُمێد ءِ کَستِرێں بْرات اَتک ءُ وَرَگ ءِ جاڈی بَیَگ ءِ ھال ئِے دات۔
<!-- /وپ:پَرَگرَپہ -->

<!-- وپ:پَرَگرَپہ -->
دێر نَبُوت کہ پِلِم ھَم ھَلِّت۔ وَرَگ آرَگ بیت اَنت۔ ھما وَرَگ کہ دِل بُگُشیت، تَہر تَہر ءِ وَرَگ پَرزۆنَگ ءِ سَر ءَ اێر اَت۔ پُلّاں وَتی چۆ اِزَّت دیَگ ءَ سَکّ وَشّ بُوت۔ وَرَگ ءُ چَرَگ ءَ رَند وَہدے دْرُست پہ گێگ ءُ گْوَم نِشت اَنت، پُلّان ءَ رَوَگ ءِ اِجازَت لۆٹِت۔
<!-- /وپ:پَرَگرَپہ -->

<!-- وپ:پَرَگرَپہ -->
“اَنّی رَو ئے؟” دِلپُلّ ھَیراں بُوت۔ “تَرا ھاسٹَل دِگِہ دِلے وَشّ بیت۔”
<!-- /وپ:پَرَگرَپہ -->

<!-- وپ:پَرَگرَپہ -->
“نہ یار! وَشّی ءِ گَپّ نَہ اِنت۔ مَن ءَ کَمّے وانَگی اِنت۔”
<!-- /وپ:پَرَگرَپہ -->

<!-- وپ:پَرَگرَپہ -->
“وانَگ باندا بیت کَنت۔ چُٹّی اِنت۔ شَرّ بواں،” سَیَد ءَ بِچکَندانا گُشت بلے چَہ پُلّان ءِ رَوگ ئے گَپّ ءَ نَگێگ اَت۔ اُمێد ءَ سَیَد ءَ را اَمتُہتی چَمُّکے جَت ءُ سَیَد ڈَنّ ءَ دَر اَتک۔
<!-- /وپ:پَرَگرَپہ -->

<!-- وپ:پَرَگرَپہ -->
“تَو وَت گُش ئے کہ شێر مَہمَد لۆگ ءَ شُتَگ۔ اود ءَ اێوک ءَ تَرا وَشّ بیت؟” دِلپُلّ ءَ جُست کُت۔
<!-- /وپ:پَرَگرَپہ -->

<!-- وپ:پَرَگرَپہ -->
“ھَو، مَن ءَ اێوک ءَ نِندَگ ءُ وانَگ وَشتِر بیت۔” پُلّاں اَنگَت رَوگ ئے ھَیال ءَ اَت۔
<!-- /وپ:پَرَگرَپہ -->

<!-- وپ:پَرَگرَپہ -->
“تَو یار کَمال کن ئے، بِنِند گَپّے جَنێں۔ پِلِمے چارێں۔ تَو یَکّ شَپے ھَم گۆں ما گْوازێنت نَوَر ئے؟” اُمێد ءَ گۆں کَمّے گِلَگ گُشت۔ اُمێد ءِ گَپّ ءَ پُلّاں گِپت۔ سَنگَتاں آ ھَمینچُک اِزَّت داتَگَت کہ آیانی گَپّ ئِے اِنّاں کُت نَکُت۔
<!-- /وپ:پَرَگرَپہ -->

<!-- وپ:پَرَگرَپہ -->
سَیَد کہ اُمێد ءِ چَمُّک ءِ سَر ءَ ڈَنّ ءَ شُتَگَت، پَدا اَتک ءُ جار ئِے جَت: “پَرپَٹ پَنچَر اِنت۔” ءُ پَدا دێم ئِے گۆں پُلّان ءَ کُت ءُ گُشت ئِے: “پُلّاں! نی تَو اِے گۆریچ ءَ گَنتِر شُت نَوَر ئے۔ مَرچی مۆسُم ءُ اولاک ھَرد مئے بُن ءَ اَنت۔” سَیَد ءِ گَپّ ءِ سَر ءَ دْرُستاں کَندِت۔
<!-- /وپ:پَرَگرَپہ -->

<!-- وپ:پَرَگرَپہ -->
پُلّان ءِ پَسُند ءِ دِگِہ پِلِمے بُنگێج بُوت۔ پَجّیا چَہواری بُوت۔ اُمێد ءَ اَنچێں وَڈے ءَ پُلّان ءِ چاہانی تَہا تۆسێنَگی دَرماں ماں گێتک کہ آ ھِچّ سَہی نَبُوت۔ اَلبَت سَیَد ءُ دِلپُلّ ءَ ھَیال گْوَر اَت۔
<!-- /وپ:پَرَگرَپہ -->

<!-- وپ:پَرَگرَپہ -->
“یار! مَن ءَ واب گِران اِنت۔” کَمُّکے ءَ رَند پُلّان ءَ گِہاسِت۔ آئی ءِ چَمّ چَہ واب ءَ ھُمار اَت اَنت۔
<!-- /وپ:پَرَگرَپہ -->

<!-- وپ:پَرَگرَپہ -->
“تَئی جاگَہ تَیار اِنت۔” اُمێد ءَ مِہمانجاہ ءِ کُنجے ءَ جَتَگێں تَہت ءُ نِپادانی نێمَگ ءَ دَست شَہار دات۔ پُلّاں بے تَہمبُلی پاد اَتک ءُ نِپادانی سَر ءَ تَچک بُوت۔ سَہتُکے ءَ رَند آ گْرانواب اَت۔ اُمێد پاد اَتک ءُ پُلّان ئِے ٹۆہێنت بلے آ سُدّ ءُ سَما ءَ ڈَنّ اَت۔
<!-- /وپ:پَرَگرَپہ -->

<!-- وپ:پَرَگرَپہ -->
“اَڈ ءِ اِے پِلِم ءَ دَر کَن یار، بَچَکّ اَتکَگ آرٹ پِلِم چاریت۔ بْیا پہ تَو پُندِتَگ اَنت ھَمِد ءَ ،” دِلپُلّ ءَ گۆں زَہرناکێں بِچکَندے گُشت ءُ سَیَد ءَ پِلِم دَر کُت۔
<!-- /وپ:پَرَگرَپہ -->

<!-- وپ:پَرَگرَپہ -->
“چےے پِر کَناں؟”
<!-- /وپ:پَرَگرَپہ -->

<!-- وپ:پَرَگرَپہ -->
“گۆریچ اِنت، باپێںے پِر کَن۔” اُمێد ءَ سَلاہ دات ءُ سَیَد ءَ باپێںے پِر کُت۔ پَدا دیوان ءَ شَرابی بۆتَلے ھَم مِکّ بُوت۔
<!-- /وپ:پَرَگرَپہ -->

<!-- وپ:پَرَگرَپہ -->
ڈَنّ ءَ گۆریچ ءَ شیکّ شیکّے چێر اَت ءُ باپێں باں گۆں وَتی باپێں چیزّاں سَکّ وَشّ اَت۔
<!-- /وپ:پَرَگرَپہ -->

<!-- وپ:پَرَگرَپہ -->
<!-- /وپ:پَرَگرَپہ -->