تَلمَل تِلاہێں سۆمَری
گْرانمَہزَبێں ماہێں پَری
بارێں کَدی بانۆر بَئے!
بارێں کَدی بانۆر بَئے!
ھِنّی زَبادێں مێنتَگ اَنت
ھَلک ءِ مُلُوکێں دُہتَراں
گَندیم چَہ دُرجێں گْوالَگاں
دْرُشت اَنت سُبَکّێں جِنتِراں
سِستَگ ھَبَر سانگبَندی ءِ
میر ءُ اَمیرێں مِہتِراں
تَلمَل تِلاہێں سۆمَری
گْرانمَہزَبێں ماہێں پَری
بارێں کَدی بانۆر بَئے!
بارێں کَدی بانۆر بَئے!
تَو پہ اُمێتے نِشتَگ ءِ
مَن پہ اُمێتے زِندَگ آں
تَو پہ یَلێں شَہزادَگے
مَن پہ وَتَن ماتێں وَتی
پہ سُہرێں گُد ءُ پۆشاکے ءَ
پہ آمَڈ ءُ مُزواکے ءَ
چَمّ داشتَگ اَنت ءُ نِشتَگ ءِ
دێم اِنت مُولُر، گیمُرتَگ ءِ
چۆ کہ تَو ئے، چۆ کہ مَن آں
کَسّ چۆ نَہ اِنت اِے آلَم ءَ
تَلمَل تِلاہێں سۆمَری
گْرانمَہزَبێں ماہێں پَری
بارێں کَدی بانۆر بَئے!
بارێں کَدی بانۆر بَئے!
گُلامُسێں شۆہاز
Golámosén Shóház