Rangzár

<!-- وپ:پَرَگرَپہ -->
اێمِنی ءِ سَتا واہَگانی سَدَپ
بْیا ءُ اِے رَنگزار ءِ تَہا اێر کَپ
مِہر ءِ اوتاگ زُرت ءُ پہ تَو گْوَپتَگ اَنت
اَلوَتانی کُدۆ
دْراہی ءِ رَہسَراں رُستَگ اَنت نازبۆ
اَنچێں کَیپے چَہ شێنکانی چَمّاں رِچیت
ھیر ءُ اِنجیر لُڈّ اَنت ءُ سَوتے جَن اَنت
شیرێں بے وانکیے شِنگیت دَمک ءُ دَراں
<!-- /وپ:پَرَگرَپہ -->

<!-- وپ:پَرَگرَپہ -->
دِل گُشیت
مَرچی گْوات ءَ را پادینک پاد ءَ بِدئے
دِل گُشیت
ماہ ءِ پێشانی ءَ سْیاہێں ٹِکّے بِجَن
<!-- /وپ:پَرَگرَپہ -->

<!-- وپ:پَرَگرَپہ -->
اێوک ءَ نِشتَگاں وَہدے جێڈاں تَرا
چَہ مَسیتے ءِ بُرزێں ھَمُک کُنگُر ءَ
بے نَگێں نُورے ءِ آبَشارے کہ جَہلاد بیت
تَو چۆ تاہیرے ءَ اێر رِچ ءِ مئے دِل ءَ
دیدَگُن بَند بَنت
<!-- /وپ:پَرَگرَپہ -->

<!-- وپ:پَرَگرَپہ -->
دیدَگُن بَند بَنت
رَنگزار ءَ پہ راہے بُجیت
سَر مَگِر اێر کَپ
اێمِنی ءِ سَتا واہَگانی سَدَپ
<!-- /وپ:پَرَگرَپہ -->

<!-- وپ:پَرَگرَپہ -->
بْیا گُڈا مَن ءُ تَو
گۆں بَہِشت ءَ وَتی نِندێں تَلّی سَرے
گْوات ءِ پادینک ءِ زێمِر شَلیت
ماہ کُٹّ ءَ تَئی اێر کئێت
کاینت اِستال
گۆں آستینک ءِ تَئی دۆچاں اَڈ اَنت
<!-- /وپ:پَرَگرَپہ -->

<!-- وپ:پَرَگرَپہ -->
رَنگزار ءِ دْرَہێں رَنگ مئے اَندَر ءَ رِتکَگ اَنت
دِل گُشیت اێر کَپ
اێر کَپ
اِمێنی ئے سَتا واہَگانی سَدَپ
<!-- /وپ:پَرَگرَپہ -->

<!-- وپ:پَرَگرَپہ -->
<!-- /وپ:پَرَگرَپہ -->