Hánol Bazhn Bit Tai Rájá

چێر ءُ اَندَرێں پَیکاراں
دِنگ ءُ بے ھُدێں اِسراراں
پِگر ءِ مَن رَگامے گْواراں
گالے پہ وَڈے کَتّاراں

دَست ءَ اِنت کَلَم مَد-ھۆشێں
لَبز ماں دَپتَراں ھامۆشێں
ھَرپاں تَل تَل ءُ سَدپۆشێں
بَنگاں کُہسَری وَژنۆشێں

چیزے پہ جَلێں اِمرۆز ءَ
چیزے پہ دِل ءِ ماں سۆز ءَ
بَرہَکّ اَنت بَہِشت ءُ دۆزَہ
جۆد ءُ گْرانگوَرێں پێرۆزَہ

گَپّاں ما کَنێں بے مَٹّێں
کاراں گۆں وَتی دَزگَٹّ ایں
راج ءِ مئے سَرۆک اَنت جَٹّێں
(پہ) دانکے چۆن دَیارے کَٹّێں

(مَن ءَ ) پَسُّند نَبَنت مَہگۆنَگ
(مَن) مِہر ءِ پێتکَگ اَنت پَرزۆنَگ
اَنگَراں کُتَگ آسگۆنَگ
ھاکاں گۆں نَبَنت دِل دۆنَگ

ماہێں سُتکَگ اَنت پێشانی
اَرسُن شێپ گِر اَنت چَمّانی
تَل بَستَگ سَر ءَ رَکّانی
بْراہ اَت سَرنِگۆن بیکانی

بے لار اِنت گَمیگ، مَن پُرسیگ
بُتکَگ مَہنَوێں لال ءِ جیگ
یَکّ سَد کُشتَگ ءُ سَد ٹَپّیگ
یَنِّہاد ءَ بَہا گۆشت ءُ پیگ

دِلدارُن نَیَیت بازار ءَ
دۆچ ءُ اَدلَسێں گۆں شار ءَ
داگے پِر نَداریت مارا
ھَیر ءُ شَرّ نَکَنت مئے کار ءَ

بانۆری مَکَن گْواپ لَیلی
کُونجانی رَم اِنت اَلبَیلی
باپ ءُ تَئی بَدَن وَشّ سَیلی
(گۆں) دَروێش ءَ نَبیت بَدپَیلی

مییایے نَہ آں دانپِنڈێں
چَمّ سَکّ اَنت مَنی دُرّاں تَئی
پاد ءِ مارسَرێں پادینکاں
دَست ءِ مَنگَلیکاں زَرّێں

(مَنی) نام اِنت شَئے مُرید دێوانَگ
اِشک ءَ ھانُل ءِ شَیدا آں
(مَن ءَ ) زۆرێں چاکَراں رَد داتَگ
ٹَگّێنتَگ بَلۆچی دۆداں
کَولاں داتَگێں اێر پْرۆشتَگ
بَستَگ سانکَلاں مُہرێناں
لَبز ءُ بۆلیاں گێدی ءِ

پیر ءُ زْیارَتُن ھِچّ نَیشتَگ
کُنڈاں تَرِّتاں، کُنڈ گَشتاں
بے گاہاں کُتَگ مُنجاری
سُہباں نِشتَگاں دَرگاہاں
شَبدێماں مَسیتُن رُپتَگ

ھِندُن گۆلِتَگ، سِندُن ھَم
گَشتُن کُوپَہ ءُ کابَہا
پاکێں ماں نَبی ءِ زْیارَت
مُوسَل، بَسرَہ ءُ بَگداد ءَ
اَلبُرز ئے سَر ءُ ماتبَنداں
بُمپُور ءُ بَہِشتێں تُوراں
سِنگانیسَرا گاڈۆکێں
(پہ) پاد گَشتاں نِہِنگ ءِ کَوراں

نِشت ءُ ماں سَر ءَ ھاک ماں رێتک
سَہتے کَندِت ءُ سَہتے گْرێت
سَہتے دِل وَتی تاواں کُت
سَہتے جِند وَتی سَہڈێنت مَن

یات وَہدے مَن ءَ ھانُل اَتک
ڈۆمبانی دَگائیں پَندَل
اَرساں دیدَگاں ھارُن کُت
جیگ گۆں چۆٹَواں میسێنت مَن
اِہوال گۆں کُت اَنت گۆں نۆداں
دِلبُرّێں زَہیر گۆں گْوات ءَ

چے دیست ءُ وَت ءَ چے چے گُشت
دِلبَند ءَ وَتی سینَگ مُشت
جِند ءَ جَت وَتی سِنگ ءُ ڈۆک
ماں رێتک سَر وَتی ھَیسیگێں

دِل گُشت کہ وَتی کَولاں بَجّ
زَہمُن کَشِّت ءُ تێزُن کُت
دَست ءَ کُت کَماں میزانێں
تیراں ماں زِہێں سُمباں کُت
اَمّێلُن وَتی لانک ءَ بَست
کاٹار گۆں دوێں تَلگۆشاں

اَگل ءَ گُشت مُرید دێوانَگ
کَولاں چۆن بَلۆچی بَجّ ئے
کَولاں داتَگێں دۆدانی
ھانُل داتَگ ءُ بَکشاتَگ
ٹَگّێنت چاکَر ءَ پہ دانکے
تُکّے کہ دَر اَتک ھاکاں کَپت
اَرسے کہ دَر اَتک چَہ چَمّاں
ھِچّ پَیم ءَ نَبیت پَد زیرَگ
اَنچۆ کہ نَبَنت اَرس شیرَگ

کارُن بِہ نَبَنت پہ زاری
بے جَمبَر چِتَور ھَور گْواری(ت)
لَگّ اَنت سینَگ ءَ ٹَپّ کاری
اِشک ءِ گۆں مَن اِنت بیماری

پاداں بْرَہنَگێں گۆں تَرّاں
زِند ءَ بے وَتی گْوازێناں
نِنداں ھانُل ءِ اَندۆہاں
واتَرّ نَباں چَہ زْیارَت

سَگَّگ کہ نَبَنت کۆہێں گَم
بَنگاں نۆش کَناں جَورێناں
وَپساں بُنزِہاں شێپانی
جاڈێں دیدَگاں واب گێجاں

سَرجاہاں کَناں سِنگاں مَن
بۆپانی بَدَل ھیرتێں رێک
آپاں مَن وَراں لُردێناں
کُمبانی تَہ ءُ کانیگ ءَ
پِنسێں مَن کُنِر چَہ چۆٹا
کۆنَر چَہ اَڈَنگی گێڈاں

پۆشاں گْوالَگاں زِبرێناں
مَن باں گۆں شِپانکاں ھَمراہ
سارباناں کَناں بے ل ءُ بْرات
شَپ جاہے رَواں، رۆچ جاہے
بَنداں مَن دِل ءَ بَندگاہے
گْوازێناں دُرۆچی زِند ءَ
مَن باں چَہ وَت ءَ شَرمِندَگ

اُگبال زُرتَگ اَنت مَن دۆست ءِ
ماہ ءُ شیرکَجێں ھانی ءِ
داگُن داتَگ اَنت بَند ءُ بۆگ
رَکّ ءُ آہِنێں پۆلاتاں
آسے مَن جَتَگ بالاد ءَ
تُہمَت بَستَگ اَنت تایدێں
زێر ءُ گَردِن ءُ ماں باسکاں

ھِچّ پَیم ءَ نَباں آسُودَگ
دۆستُن نِشتَگ ءُ دِلتَنگ اِنت
کۆٹ ءُ چاکَری ماڈی ءَ
نِشتَگ پہ مَن ءَ ھیسکاریت
سَد بَر پاد کئێت گۆں بْرَمشاں
سَد رَند ءَ دَریگاں بۆجیت

اوہِ اُو مُرید دێوانَگ!!
اَگل ءَ گۆں وَتی کۆرمَیمێں
اێر کُت دَپتَراں راجَئێگ ءَ
کارے بے سَر ءُ اَنچائیں
دانکہ اِے جَہاں مانیت
دانکہ پَد نَبَنت شاگێں وَہد
تْرانَگ تَئی دِلاں گُجّ بَند اَنت
ھانُل بَژن بیت تَئی راج ءَ

چێر ءُ اَندَرێں پَیکاراں
دِنگ ءُ بے ھُدێں اِسراراں
پِگر ءِ مَن رَگامے گْواراں
گالے پہ وَڈے کَتّاراں

گُلامُسێں شۆہاز