دِل ءَ ماہِکان اِنت، تَو پَرچا نَیا ئے
اِے مۆسُم جَوان اِنت، تَو پَرچا نَیا ئے
اِے مێتَگ تئیگ اِنت، اِے رۆچ تَئی سَریگ اِنت
پَدا ھَور رِچان اِنت، تَو پَرچا نَیا ئے
تَئی گُلّاں مَن چُکّاں سُہر ءُ پُترُونکێں
گَمیگ زِندمان اِنت، تَو پَرچا نَیا ئے
دو رۆچ زِندَگی ءِ تَئی زُلپانی چێرا
دِلُن اِنسِران اِنت، تَو پَرچا نَیا ئے
تَئی تاسێں بَدَن مئے شَرابێں ھَیال ءَ
وَڈے سَر رِچان اِنت، تَو پَرچا نَیا ئے
تَئی بالاد ءِ وَژبُو گَماں اِشکِرێناں
پَدا بُن گِران اِنت، تَو پَرچا نَیا ئے
گۆں ٹَہل ءُ نازاں، گۆں داباں وَتیگاں
بْیا وَہد گْوازێن اِنت، تَو پَرچا نَیا ئے
مَن کَولیگ ءُ کُرباں آں تَئی لۆٹَگانی
مَنی دِلبَر کَسان اِنت، تَو پَرچا نَیا ئے
تَو بانۆر بات ئے، مَن سالۆنک باتاں
ھُدا مِہرَبان اِنت، تَو پَرچا نَیا ئے
تَو ھِند ءُ سِند ءَ مَنِند جانِ شۆہاز
مئے مُلک مَکُّران اِنت، تَو پَرچا نَیا ئے
4-مارچ-1999
گُلامُسێں شۆہاز
Golámosén Shóház