Ráji jangáni tahá tai gwará haminka “Self-reliance” bebit bale taw cha donyáyá sest nakanay. Selahbandén jangéay tahá tai “morality” tai nézgáriay darangázagay masterén seláh ent, éoká topang na. Pameshká báz randá dozhmen tai háterá wat espays (space) pédág kant, tará jaháni jahtá tahná kanagá.
7 Aktubará, marchigén róchá, Musád Hamásá wat espays dant, é kandhá Musád wat hálig kant pa Hamásiáni porr kanagá. Hamásiáni choshén békupi pa Palastinián tárikay gránterén dawrá kárit. Marchi yakk lakká gésh Palastini shahid bitag. Hamás tahná bitag. Hamé Arab molkáni gwará ham Hamásay pallámorziay jawáz pasht nakaptag. Palastini Hamásay békupián tahná kortagant. Badkesmati padá esh ent ke é gapp ke é rawiyah Palastiniáni hakká naent, é gapp wájahén Aydhwardh Saidá 40 sál pésar jatagant, Yáser Arpátá 30 sál pésar máretagant.
Balóchestáná lahté mardomay sarkasshi o békupián Balóch tahná kortagant. Bendát cha Ján Solékiay (John Solecki) agwáyá but. Ensáni hakkáni mardoméá taw parchá, pa kojám nimóná chest kanya?
Domi Chini sapáratay sará orosh at. Balóch donyáyá neshtag, cha donyáyá jetá naent. Lahté jahángirén kánud ant ke harkasá áyáni randgiri kanagi ent. Donyáyá sapáratkár o sapáratay sará orosh gayrkánudi amalé. Érán o Amrikah jangá ant bale áyán kassá domigay sapáratáni sará oroshay hakk nést chiáke é myánostománi kánud “Vienna Convention on Diplomatic Relations 1961”ay chathén helápwarzié. Bale wájakár na jaháná mán kárant o na dege kánud, anchó ke wati páthiay kánudá namannant, watsatáiay ámách ant, eshán pa Wyáná Kanwenshan ham máná nadárit.
2006 o 2007ay jangay wahdá hamé wadhá Palastini hiraw Hamási bitagant. Alpatehesh cha Palastiná kasshetag. Marchi Palastinay tabáhiay bonyád ham Hamási ant.
Donyáyá anchén watsatáyáni sawabá Balóch tahná ent. BLA drahén molkán dahshatgard karár dátag. Démá UNO ham BLAá dahshatgardiay ladhá hawár kant, yakk o do sálay andará, chiáke Pákestán o Chinay apil UNOá zére gawr ent. Bale bazzagén Balóchok gal ent ke má 100 warná watkoshá dém dátag. Bazzag nazánagá ant ke myánostománi taká má gón wati kárpadán Balóchay táriki jonzay démá syáh kanagá én. Hamá jonz ke áiay bonyád hakk o ensáni barábari o “liberalism”ay sará bitag, marchi Bashir o Allanezará cha Hamásezamá ganter kortag.
Bashir Shóház
