Ché shahárán pa taw? Ché shahárán pa taw?
Sohrén pollé golábay yá bechkandagé
Mortagén wáhagé? Sotkagén tránagé?
Yá delay métagay tonnagén kahcharán?
Drachk o dárán, abétkén pedh o rahsarán?
Kalkash o máhekánay molurén tabá?
Bégahay éokiay shapay menzelá?
Sohbay tahnáiá, kawshay béchádhiá?
Ché shahárán pa taw? Ché shahárán pa taw?
Sohrén pollé golábay yá bechkandagé
Yáke mehráni granché shahárán pa taw?
Pach kanán mehray ganjén ketábá delay
Labz labzá tará pésh dárán chetawr?
Poll gimortagant é delay métagay
Hajgén bechkanday dhokkál ent har némagá
Wáhagán anchó ambázetag gam delá
Mehray darshán bégánagén rahsaré
Dur sar kaptagén rahgwazáni wadhá
Gwátay gimortagén shikagé bégahé
Ás mán dáshtagén wáhagay jangalé
Chóke wayránagán mantagén shántolé
Zahir nálit ganóki, balénit shapán
Máhekáná rajit syahshapi hennié
Zenday har wasshiá ché zebahrén tabé
Wahday béchádhiáni nawasshén gamé
Gam zabádáni Shirnázéay per naant
Nay pa béhájatén delbaréá zarán
Gam mani sarzeminay dochár ant maná
Brát o mát o petay kóshay gránén gam ant
Sotk o sóch métag o shahr o bázár o dagg
Ás rók ent mani golzeminay delá
Anchó sotkag mani mehray tab shádehén
Del goshit kárch o hóná gón johdé benaksh
Daptaré pa wati mádarén sarzemin
Dánke mánit jahán pa watan sarjamén
Poll o mesk o zabádáni bóán shamósh
Mehray har wáhagá dard o ranjé bopósh
Ché shahárán pa taw? Ché shahárán pa taw?
Sohrén pollé golábay yá bechkandagé?
Shawkat Dhagáráni
Shawkat Dhagáráni