Wassh o sáchánén sohbé at. Nód shanzagá atant. Hániá gón dazgohárán pa kishá jangalay erádah kotagat. Hamesh ent pa rawagá jádhi atant.
Man wati lógdapá dhikiay sará neshtagatán o ázmáná kunjáni thóliá nedárah kanagá atán ke baré yaddhawlé layb kanáná rawán atant. Anágatá Hániay borzén tawáré mani góshán kapt ke dazgoháráni sará ják kanagá at.
Háni chónáhá hasaddi, badru o thahlokén jenekké naat, sakkén delpahk o bédarwarén mehrawáné at. Bale áiay dazgohár pahkén nábud, kasshán o bétahmbol atant, pameshka Haniá modám áyáni sará koppet.
Man Hániá rók róká cháragá atán. Á zahriay wahdá géshter dhawldár at. Choshke á sakkén espét o tanakpósté at pameshká incho koppag o zahr geragá áiáy dém sohr tarretagat.
Hamé damáná Hániay cha zahrá sarréchén chamm maná kaptant o dán dérán may hóshámén chammán dhik wárt. Hániay didagáni zahr ni gwashay mehray tahá badal bayán at.
É sahtá pa man cha mani chammán shatter hecch naat ke maná Hániay chammáni mehrawániá pézh dáragá atant.
Áiá wati chamm pa mehré táb dátant o eshárahy kot: "kishá nayáay?"
Man delmáng atán ke borawán gón o Hániay ham hamé wáhag at.
Bale padá majgá wadh wadhén hayál wadi but ke bárén Hániay dazgohár ché pahmant, may bábatá che pegr kanant. Balkén goshant ke parchá é harjáh lendhek ent, é bachakki diwáné wa naent nayke edá dege bachakké gón.
Gón hamé jédhagán man gwandhén bechkandé jat o pa "enná"á sar sorént.
Chónáhá man deljam atán. Pa man Hániay hamráhi inchokén jédhahé naat, chiáke manig o Hániay lóg nazzik atant. Pameshká má pa yakk o domiay dochár kapagá bázén adh o janjáláni démpán naatén.
Áiá lónsoké dát o dém tarrént.
Man Chamm chest kotant tán ázmán hórk at, nódán borretagat, róch brahnag at o sará mélánk at.
Bale nazánán kunjáni thóli wati menzelá sar at yáke nán…!
Lálá Kolbari