11 Jun 2018
Pachén Kágadé Dhisi Jánmahmaday Námá
Mani gehén wájah!
Mani Balóchi labzánkay bráh, Dashtay madháh o shán! Tai Balóchidóstiá salám bale gappé tará hál dayag lóthán. Báed ent mardomay yádásht incho ón nezór mabit ke wati zikén dánkáni chappá yakk anchén káré bekant ke á dán zendag ent, pashómán bebit.
Balkén tará yád bebit, agan béhál ay godhá tará tránagá perrénán ke Balóchi mahtákay ták ták sháhed ent ke hamá mardom ke ráji jonzay námá Balóch rájá répénagá atant, taw dhóbáretant o mahluká tará dhóbáret ke taw may rájdóstén rahshónán bohtám janagá ay. Zik ke áyáni zagrén dróshom paddar naat, mahluk rad kaptagat. Á rájay dastáni delá atant, marchi ke á paddar ant, áyáni nám léngáth ent!
Mani gehén nadkár! Balóchi zobánay paházkár! Marchi taw ham hamá ráhá raptagay ke zik léngáth rawán at. Godhá tai kotgénáni padá bándá Balóch ráj tará kojám námá bedant?
Tará yád bit ke tai hamé nebeshtánk ke taw zikén rahshón o marchigén léngáthán sará nebeshtagetant, bázá pa kast shimázay nám bastant! Tai delá zikén Balóchi labzánkay nadkárén Jánmahmad o maóchigén Pakestánay pálemáni syásatay mannógerén Jánmahmad bándá kojám námá tawár kanag bit!?
Cha watá bégánahén shamoshkár! Agan tará wati zikén dánkáni bandá nadásht yá taw shamoshtant bale wati pézhgáh mashamoshtén, hamá pézhgáh ke ódá yakk bámardé wáb ent, tará hamáiay bandá bedáshtén. Taw Hamiday arwáh bétáhir makotén!
Agan taw béhál ay, tará tránagá perrénán ke marchi ke man é chárén dánkán nebeshtah kanagá án, hamá bámard ke tai pézhgáhá wáb ent, áiay shahidiay 37omi sálgasht ent.
Balóchá modám goshtag ke agan man nezór án, cha wati hónidárá wati bérá gept nakanán bale démá gept kanán.
Démay gerag wati jáhá, gón wati koshendahán hawár bayag kojay Balóchi ent ke taw kot! Degerán nazánán maná é gat pa tará nést at ke tawe Dhisi Jánmahmad ke na tará zarray garaz hast o na námay, á kojám láchári at ke taw watá chó pólengi kot. Agan gapp torsay bitén, taw wa dir atay, cha hapt daryáyá posht byá o watá sobakk bekan, rájay shahidáni chóraw o janózámén mát o goháráni démá sotkagén lógáni porán wati démá mosh o watá sobakk bekan.
Dashtay surmagén polkáni jáh nesht!
Tará yád bit ke taw yakk rájdaptari shayré tarréntagat ke
"Hammalay hamráh bédelén Dashti bitagant".
Bale taw é gapp namannetagat o Jadgál o Hótáni sará dátagat. Chó mabit rájdaptar watá nók kanagá ent, gón tai é kerdá zikén Hammalay hamráh kay atant, zánag nabit bale marchi shahid Hamiday hamráh koj ant, zánag bayagá ent. Zikén Hammal o marchigén Hamiday hamráh hamá yakkén ant.
Háwanday mayár ham tará kot naknán ke Pakestánay pálementhay hast bayag mani marg ent.
Balóchi zobánay gazórén nadkár
Hasá Bejjár